Ghjennaghju
(Canta u populu corsu)

Un ghjornu singhjuzzava a vigilia bughjura
I carrughji attuniti cuntavanu i sò morti...
Tandu entre u pastore cum'è batelli à i porti
Calmi è s'indinoghja è sdrughje a paura.

Preca à core scioltu è si sparghje l'amore
S'hè zitta ancu l'aria aspettendu a chjama
Di a voce porta pace chì tutta a ghjente brama
S'hè piatta ancu a zerga è parla u signore.

"Statu omniputente tù chì stai in l'imperu
Di forse accanite è di ferru è di focu
Lacami sti figlioli è lacami stu locu
Ùn mandà più saette contr'à u so addisperu.

Ùn parlemu di lege è guardenu li dritti
Si sò pisati tutti contr'à la to inghjustizia
Di mani è di voce ne cresce una divizia
Sguizzera torna u sangue sè tù ùn li lachi arritti..."

Ma queste ùn sò voce chì sente a preputenza
Hè debbule u Signore in pettu à u statu petra
I fiumi impauriti correnu à l'ombra tetra
Di a guerra chì rinova quell'antica viulenza.